Omar Sharif, “Doktor Zhivago” që pushtoi kinemanë botërore

 

Nga Leonard Veizi
 
Për publikun shqiptar, Omar Sharif ishte një fytyrë e njohur përmes disa prej roleve të tij që arritën të shfaqeshin në kinematë e kohës, por kryevepra e tij absolute, “Doctor Zhivago”, mbeti për dekada e paarritshme, e censuruar rreptësisht nga sistemi komunist. Ky film epik dhe roli i tij më ikonik do të mund të zbuloheshin nga shqiptarët shumë më vonë, vetëm atëherë kur perdja e hekurt ra dhe izolimi kulturor la vendin për lirinë e plotë të artit...
 
…Më 10 korrik 2015, kinematografia ndërkombëtare humbi një nga ikonat e saj më magjepsëse. Omar Sharif u nda nga jeta në moshën 83-vjeçare, duke lënë pas trashëgiminë e një artisti të jashtëzakonshëm që kapërceu çdo kufi kulturor dhe u shndërrua në simbolin e bashkimit mes Lindjes dhe Perëndimit.
 
Origjina dhe kthesa e madhe e jetës
I lindur në Aleksandri më 10 prill 1932 si Mishel Demitri Shalhub, në një familje të krishterë me rrënjë libanezo-siriane, ai do të ndryshonte rrjedhën e jetës së tij si në aspektin personal, ashtu edhe në atë profesional. Për dashurinë e jetës së tij, aktoren e njohur egjiptiane Faten Hamama, ai u konvertua në Islam dhe mori emrin që do të njihej në mbarë botën: Omar El-Sharif. Romanca e tyre mbetet ende sot një nga historitë më përrallore të botës arabe.
 
Rruga drejt majave
Karriera e tij mori përmasa globale në vitin 1962, kur roli i Sherif Aliut në kryeveprën “Lawrence of Arabia” i dhuroi një nominim për Oscar dhe çmimin Golden Globe. Megjithatë, ishte viti 1965 ai që do ta vuloste përjetësisht emrin e tij në historinë e artit. Ai jetësoi Juri Zhivagon në filmin epik “Doctor Zhivago”. Ky interpretim prekës e shndërroi atë në një ikonë botërore dhe në një nga fytyrat më të dashura të ekranit të madh.
Në gjashtë dekada karrierë, Sharif shkëlqeu në dhjetëra produksione të tjera të mëdha, përfshirë “Funny Girl” apo “Vajza e thjeshtë”, krah Barbara Streisandit. Me një elegancë të lindur, zë të ngrohtë dhe shikim magnetik, ai u bë aktori ideal për të portretizuar aristokratë, princa dhe personazhe me një botë të ndërlikuar shpirtërore.
 
Pasionet dhe vitet e fundit
Përtej aktrimit, Omar Sharif kishte një tjetër talent të spikatur: lojën e bridge. Ai renditej ndër lojtarët më të mirë në botë, shkroi libra strategjie dhe mbajti rubrika të rregullta në gazeta të rëndësishme ndërkombëtare.
 
Ura midis dy botëve
Omar Sharif dëshmoi se talenti i vërtetë nuk njeh kufij gjeografikë. Ai mbetet dëshmia e gjallë se një djalosh nga Egjipti mund të pushtonte majat e Hollivudit pa humbur kurrë magjinë e origjinës së tij.
Në perëndim të jetës së tij, aktori u përball me sëmundjen e alzheimerit. Ai mbylli sytë përgjithmonë në Kajro më 10 korrik 2015, pas një infarkti në zemër, duke u larguar nga kjo botë si një legjendë e pavdekshme e ekranit.