Rembrandti, njeriu që revolucionarizoi pikturën evropiane

 

 

Nga Leonard Veizi

Me një përdorim novator të dritës dhe hijes, ai e shndërroi pikturën në një gjuhë emocionesh, ku çdo fytyrë, çdo vështrim dhe çdo detaj rrëfen një histori. Sepse gjithmon e kurdoherë ka artistë që dinë pikturojnë botën ashtu siç duket dhe ka të tjerë që arrijnë të zbulojnë atë që fshihet pas saj. Rembrandti ishte ndër këta të fundit. Për kohën ku jetoi, arti i tij ishte një hap i guximshëm drejt një realizmi të ri, që i parapriu zhvillimeve moderne të pikturës evropiane....

...Më 15 korrik 1606 lindi në qytetin Leiden të Holandës Rembrandt Harmenszoon van Rijn, një nga piktorët dhe grafistët më të mëdhenj në historinë e artit botëror. Ai konsiderohet figura më e shquar e Epokës së Artë Holandeze, një artist që revolucionarizoi pikturën përmes mënyrës së veçantë të përdorimit të dritës dhe hijes, realizmit të thellë dhe aftësisë për të depërtuar në botën shpirtërore të njeriut.

Që në moshë të re, Rembrandti tregoi talent të jashtëzakonshëm për vizatimin dhe pikturën. Pasi u formua në Leiden, ai u vendos në Amsterdam, ku fitoi shpejt famë si portretist dhe mori porosi nga tregtarë, fisnikë dhe institucione të rëndësishme të kohës. Me penelin e tij ai nuk synonte vetëm të riprodhonte pamjen fizike të njerëzve, por edhe karakterin, emocionet dhe historinë e tyre.

Gjatë karrierës së tij krijoi mbi 300 piktura, rreth 300 gravura dhe mijëra vizatime. Veprat e tij përfshijnë portrete, autoportrete, peizazhe dhe skena biblike e historike. Ndër krijimet më të njohura janë "Roja e Natës" (The Night Watch), e konsideruar një nga kryeveprat e artit perëndimor, si edhe "Mësimi i Anatomisë i Dr. Tulp", një vepër që dëshmon mjeshtërinë e tij në kompozim dhe në paraqitjen dramatike të dritës.

Rembrandti realizoi më shumë se 80 autoportrete gjatë jetës së tij, duke dokumentuar në mënyrë të pazakontë kalimin e kohës, ndryshimet e moshës dhe përjetimet personale. Këto vepra përbëjnë një nga dëshmitë më të pasura artistike dhe psikologjike të historisë së pikturës.

Megjithëse arriti kulmin e suksesit në mesin e shekullit XVII, jeta e tij u shënua edhe nga tragjedi personale. Humbja e bashkëshortes Saskia, vdekja e disa prej fëmijëve të tij dhe vështirësitë financiare e çuan drejt falimentimit në vitin 1656. Megjithatë, ai nuk e ndërpreu krijimtarinë. Përkundrazi, veprat e periudhës së fundit fituan një thellësi emocionale dhe një forcë shprehëse edhe më të madhe, duke dëshmuar pjekurinë e tij artistike.

Rembrandti u nda nga jeta më 4 tetor 1669 në Amsterdam, por trashëgimia që la pas mbetet e pavdekshme. Veprat e tij ruhen në muzeumet më prestigjioze të botës dhe vazhdojnë të frymëzojnë artistë, studiues dhe dashamirës të artit. Emri i Rembrandtit mbetet simbol i mjeshtërisë, humanizmit dhe i një arti që arrin të prekë shpirtin e njeriut edhe pas më shumë se katër shekujsh.