Shqiptarët, këta budallenj të pandreqshëm

Nga Leonard Veizi

Që shqiptarët kanë qenë trima të çartur këtë e ka provuar historia. Kanë pasur shpirt rebeli dhe e kanë “blerë” lirinë me koston më të lartë të mundshme. Por kjo duhet të ketë ndodhur kohë më parë. Sa për të mençëm duhen vënë sërish në kandar, se ai që u përdor në fillimet e shtetformimit duhet të ketë pasur ndonjë cen, sepse të paktën që prej vitit 1997 llogaritë nuk po na dalim mirë. Jo për gjë, por u bënë vite e vite që shqiptarëve u ka dalë nami, në Evropë, Amerikë e ca më tej, vetëm për trapllëqet me brirë që kanë bërë. Dhe që shqiptarët po kthehen dita-ditës në budallenj e trularaskë, kjo po vazhdon të vërtetohet.

-Çfarë i dini shqiptarët, budallenj? – ngre pyetjen e tij retorike kryeministër Edi Rama, si lider sharmant e largpamës që është. Dhe me këtë pyetje tërheq vëmendje dyfishe, fillimisht Lulit që mban pozicionin e lartë të Liderit të Opozitës së Bashkuar, dhe vetë shqiptarëve që mbajnë pozicionin bazë, atë të Popullit të Thjeshtë. Sepse, me sa duket Rama e di mirë që shqiptarët janë budallenj e s’kanë nga venë. Por i pëlqen loja e fjalëve dhe vërtetimi katërcipërisht i asaj që thotë. Natyrisht që budallenj janë o Edi, përderisa nuk ngrihen e t’u marrin me hu ty si kryeministër dhe Lulin si pretendent, e t’u luajnë në vend të dajres, po ende u votojnë në rresht për një, socialistët mavi, të farkëtuar dikur nëpër mbledhjet e organizatave bazë dhe pd-istët e thekur fraksionuar po nga e njëjta organizatë.

Si t’u them të mençur shqiptarëve unë, kur ti i gënjen ditën për diell dhe ata të dëgjojnë si bufa: u flet për mjekësinë falas, kur shqiptarët këputen e vdesin me shumicë o nga kanceri o nga sëmundjet e zemrës. Dhe rrallë qëllon që ndonjëri prej tyre të iki tak-fak, pa lënë në dyert e spitaleve, në mos shtëpinë, të paktën thesin me para të marrë borxh. Se derën e spitalit nuk ta hap as roja, një “gangster” me rrogë 200 euro në muaj, e që armën më të fuqishme ka një shkop gome, dhe jo më mjeku që ka zaptuar fronin e mëkëmbësit të Zotit në tokë. Por ndoshta këtu nuk ke edhe shumë faj, se ti as që e di se ku e ka vendndodhjen Spitali Universitar “Nënë Tereza”, e jo më të dish problematikat aty. Me gjasa Shërbimet Sekrete të njoftojnë për shashkat dhe molotovët e luftëtarëve të opozitës, por nuk të informojnë se jo fort rrallë spitali mbetet pa ilaçe sepse administrata nuk ka arritur të bëjë tenderin e radhës. Por ti i dashur kryeministër, bëj zamet e çap një herë vetë deri në spital, pa shofer e truproja, dhe të jesh i bindur se do ndeshësh në rojën me uniformën e policisë private që do të të vendosi shkopin e gomës në gjatësinë e rripit të pantallonave, e do të të thotë: “Ku shkon ti or pallë, se di që ky vend ka zot...?” Aty do të fillosh të kuptosh se si funksionon “shëndetësia falas”.

Si mund ta vesh në dyshim budallallëkun e shqiptarëve që i paguajnë rrugët nacionale me ca asfalt mbi to dhe ato të fshatrave gjithë gurë e gropa, nga tre katër herë në vit, e nuk ta thonë një gjysmë fjale. Madje janë të lumtur që po ndihmojnë në shtesën e kostos për Rrugën e Kombit dhe mezi po presin të taksohen disa segmentet e tjera, që për hir të së vërtetës janë aq të shkurtra sa u del në fund pak minuta pasi ke futur dhe marshin e pestë. Por duhen taksuar ato dhe shqiptarëve u duhen lehtësuar ca xhepat. Nuk ka dietë më të mirë në një vend ku dhjami ka zënë dhjamin prej ushqimeve me hormone që mbushin tregjet. Se shqiptarët, vetëm një gjë e bëjnë mirë e me sukses të plotë, të shajnë, të shfryjnë e t’u bien borive kur ecin me makina nëpër akset që prej dhjetë vjetësh nuk mbarojnë dot, por veç tenderohen se demek nuk u dalin paratë. Dhe gjënë që dinë të bëjnë më keq është të bëhen një herë bashkë e t’u mbledhin rripat me kërkesë llogarie për paratë e tyre të pakta që shteti ua merr duke u thënë se do t’ua investojë në punë publike.

Si mund të mendosh që përderisa nuk janë budallenj, shqiptarët sigurisht janë të mençmit e dheut, e të aludosh mes të dyjave, teksa ti si kryeministër u shkrive për t’i bërë sa më atraktiv kurikulat mësimore, dhe në fund të të gjithë reformës u dhurove klasave të para librat të cilat ua more sërish, pasi u dhe një këshillë kërcënuese 6-vjeçarëve të djeshëm: “Sakën se i prishni!”. Thuhet se gjëja e dhuruar nuk kthehet, por ti anapulla e kërkove dhe shqiptarët t’u bindën or babam. Dhe këtë nuk e bënë se janë të mençëm, por se dinjiteti u ka zbritur nëpër shalë, e ku ka mbetur te kyçet e këmbëve. Në të vërtetë shqiptarët e shkretë në vend t’i vërvitnin në hale paketat me libra që u “dhurove”, e të mos e pranonin fare këtë lloj lëmoshe, u turrën të blinin fshirëse gome me shumicë që të hiqnin nga fletët e abetares dhe aritmetikës shënimet që u kishin bërë fëmijët gjatë procesit mësimor.

-Shqiptarët nuk janë budallenj, - thotë Rama, herë si kryeministër i ngrehur kur del në foltore, e herë si qytetar mjeran kur kërkon vota cep e më cep të Shqipërisë.

Po or po, shqiptarët janë budallenj, mos e ki atë hall, përderisa votën vazhdojnë të ta japin, o Ty, o Lulit o Monës.