Një parashikimin astrologjik për shqiptarët, 2024-tra miell për petulla dhe para me thasë

Nga 

Leonard Veizi

 

Mirë apo keq, viti me numër tek 2023 iku. Presim atë me numër çift 2024. Por si do të jetë ai për shqiptarët?

E mo rrotë, ku të shkon mendja, - iu drejtova vetes me superlativë. - Ti nuk di ç’do bëhet me fatin tënd, e jo të marrësh vesh ç’fat do të kenë shqiptarët?!

Mirëpo krimbi s’të lë. Sepse dhe fati i individit është i lidhur më atë të popullit, që do të thotë se dhe fati im mbetet i lidhur pazgjidhshmërisht me fatin e shqiptarëve. Fjala vjen, fati i keq i vendit të futet në luftë... Domosdo, do më thërrasin nën armë. Një pushkë model 56 në sup, një vezme me fishekë dhe nja tre a katër bomba dore në brez, kundragazin pas qafe dhe yxhym në front. Me pak shans mbetesh dëshmor dhe nderon kombin e familjen.

Qoftë larg lufta!

Por si do jetë viti 2024 për shqiptarët? Jo për gjë, por që t’i dalim të keqes përpara.

Pyetjes time idiote kishin mirësinë që ca njerëz të mençur t’i përgjigjeshin: Shiko horoskopin.

U pataksa. “As për kaq gjë nuk të shkoi mendja?”

Mirëpo del dikush tjetër dhe të lehtëson nga brerja e ndërgjegjes: Debil je ti të merresh me budallallëqet e horoskopit? Drejtoju astrologjisë më mirë e do marrësh përgjigje ekzakt.

Ja, kjo është punë, më erdhi dhe pas midesë. Po si t’ia bëja, se kush e di sa e kishin orën ata që shihnin yjet nga penxherja e dhomës së gjumit. Të thajnë piten sot, sa t’u biesh në dorë.

Por Zoti s’të lë pa risk. Kësaj radhe të vjen një këshillë tjetër, e qartë dhe e kthjellët si kristali: Epo qenke merhum fare o derëzi. Pyet në internet se ta jep xhevapin vetë. Nuk të vjen asnjë faturë.

Birinxhi.

U futa me kokë si baldosa në thekër, drejt e në google. Studiova sa më dolën sytë vendit dhe pas kësaj nxora nja dy përfundime të vlefshme: Viti 2024 do të jetë për shqiptarët më i mirë nga ana ekonomike. Dhe këtë nuk e them unë, që nuk marr vesh nga bilancet dhe prodhimi i brendshëm bruto. Këtë e thonë yjet. Dhe yjet do të na favorizojnë ne si shqiptarë. Mjaft kemi vuajtur. Viti 2024 është numri “8” që në numerologji do të thotë se është një numër që tërheq paranë.

-Punë ka për të gjithë. 10 franga e sipër

-Po daleni mo ta marrim vesh ç'thotë!

-Thotë se Italia e ka shtruar sofrën xhaxha, se zotrote duhet të mbash lugën në brez.

-Lugën the?!

Po pse viti 2024 mban numrin “tetë”?

Pyetje një milion dollarëshe. Po që t’i fitosh këto para duhet dhënë një përgjigje. Epo paska qenë e thjeshtë. Mjafton të mbledhësh numrat që shifrojnë vitin.

2+0+2+4=8

Ja ku është i gjithë sekreti o t’u bëfsha! Nga një milion dollarë zbriti në 10 dollarë përgjigja.

Nejse. Lek dhe suksese.

Të keqen o Jupiter!

-Eeeee. Do të shqepemi me petulla, - ia thekën ballistët e Selfo Qorrit, pasi i vodhën shoferit që transportonte armë, nja dy thasë më miell e fishekë bashkë. E pas kësaj ia morën këngës:

 

Dhe flamuri kuq e zi

Dhe kombi lart po shkon

Shqiptarët për Shqipëri

Ja të vdesim ja të rrojmë!

 

Dhe ne i kemi dhënë drejtim: do rrojmë e do gëzojmë! Për më tepër ku astrologjia dhe vetë horoskopi të favorizon e të thotë se këtu do të dyndet leku. Po si e qysh, e tek??? Për këtë yjet nuk jepnin ndonjë shpjegim sagllam.

Gjithsesi, astrologjia të sqaron se në vitin 2024 planeti i Jupiterit futet në shenjën e Demit... apo ka tranzit shenjën e Demit. Në vetvete, shenja e Demit përfaqëson anën financiare, pra një shenjë që tërheq paranë. Kjo ka të bëjë me të qenët i organizuar e me plane të mëdha. Kjo është ideja e Demit si shenjë.

Ndërkohë numri “8” ka të bëjë dhe me rritjen në detyrë. Si dhe me manifestimin e ideve që do të thotë: atë që manifeston atë do tërheqësh, ose ajo do të të vijë. Po manifestove gjëra negative do të vijë e keqja.

Aman o shqiptarë dema, mendoni pozitivisht që të shohim ndonjë ditë të bardhë.

Ndërkohë në letrat “Tarot”, numri “8” i ashtuquajtur ndryshe “Strength” do të thotë: fuqi. Kjo ka të bëjë me shenjën e Luanit. Këto dy shenja, pra Demi dhe Luani do jenë në lojë në vitin 2024. Shenja jo shaka. Një Dem dhe një Luan. Kafshë të rrezikshme boll. Por dhe me dinjitet. Do thoni ju, tek e fundit kafshë janë. Po ja që kështu qenka e ndarë bota. Ec e mos beso po deshe!

Po 2023 që lamë pas tanimë?

2023 në numerologji mbahej si numri “7”. E thjeshtë dhe kjo. S’do mend e kalem tanimë. Mjafton të mbledhësh shifrat e vitit. Dhe numri “7” ka të bëjë me energjinë kur t’i ngujohesh në shtëpi dhe punon me veten: çfarë ke bërë në të shkuarën, çfarë po bën në të tashmen e çfarë do të bësh në të ardhmen. “7” në numerologji ka të bëjë me të mësuarit në çdo fushë të jetës. Ka të bëjë dhe me të punuarit me veten. Por pa plane e projekte. D.m.th pasi kemi mësuar shumë gjatë vitit 2023 që të hapen sytë për të kapur ndonjë lek gjatë vitit 2024.

Ja, kaq e thjeshtë ishte.

Po të jetë i saktë ky parashikim edhe për shqiptarët?

U jallah!

Demek do të shqepemi me petulla... nga “mielli i gjermanit”.