Një vizitë
ndryshe në Nju Jork
Nga Leonard
Veizi
Çfarë mund të bësh
në Nju Jork nëse je për vizitë turistike dhe nuk të duhet as të ngjitesh e të
zbresësh shkallët e metrosë për të kapur trenin, as të respektosh oraret e
ngjeshura të punëve? Pasi ke parë pikat më të njohura të qytetit – ato që i
vendos menjëherë në rrjetet sociale me lokacionin “Times Square” apo “Brooklyn
Bridge” e “Manhattan Bridge” – vjen çasti kur dëshiron të gjesh diçka më të
pazakontë, diçka që ta justifikojë udhëtimin tënd nga Tirana ballkanike drejt
metropolit më të madh të botës.
Një nga këto vende
është Fort Totten.
Fort Totten –
kujtesa e një qyteti
Fort Totten është
një ish-instalim ushtarak i Ushtrisë së Shteteve të Bashkuara, i vendosur në
lagjen Queens, buzë Long Island Sound. Në krye të Gjirit “Little Neck”, aty ku
lumi “East River” zgjerohet, kjo fortesë ka qenë për dekada pjesë e strukturave
mbrojtëse të Nju Jorkut.
Sot, ndërsa një
pjesë e territorit administrohet nga qyteti, aty ndodhen edhe objekte të
Rezervës së Ushtrisë Amerikane. Një ndër më të veçantat është Klubi i
Oficerëve, i quajtur “Kështjella”, ku Shoqëria Historike e Bayside organizon
evente dhe ekspozita. Prej vitit 1986, Fort Totten është i regjistruar në
Regjistrin Kombëtar të Vendeve Historike.
Por Fort Totten
nuk është vetëm një monument i historisë ushtarake. Aty gjendet edhe një dëshmi
e gjallë e 11 Shtatorit 2001: kamioni FDNY 55-8087.
Kamioni që
mbart kujtesën
Ka çaste kur një
automjet nuk është më thjesht një mjet shërbimi, por shndërrohet në dëshmi të
gjallë të historisë. Ky është rasti i kamionit zjarrfikës FDNY 55-8087.
Ndaj vizita ime në
në Fort Totten të Nju Jorkut dhe fotografia pranë kamionit FDNY 55-8087 më bëri
të ndjej më afër 11 shtatorin e vitit 2001, ditën që ndryshoi botën.
Ky kamion, i
njohur ndryshe si “Ladder 343”, mori pjesë në operacionet e shpëtimit në Kullën
Veriore të Qendrës Botërore të Tregtisë. Ai mbeti i përdredhur dhe i
shkatërruar nën rrënojat e asaj dite, duke bartur përjetësisht gjurmët e
tragjedisë.
Për një kohë të
gjatë, automjeti u ekspozua në Muzeun Përkujtimor të 11 Shtatorit në Ground
Zero. Sot, ai ndodhet në Qendrën e Rezervistëve të Ushtrisë në Fort Totten,
pranë një shtatoreje bronzi përkujtimore që nderon viktimat dhe heronjtë e asaj
dite.
Njësia e
Shkallëve 3 dhe Kapiteni Patrik Braun
Njësia e Shkallëve
3, me stacion në East Village, Manhattan, ishte ndër të parat që iu përgjigjën
sulmit terrorist. Kapiteni Patrik “Padi” Braun, një veteran i marinës dhe
figurë e respektuar në FDNY, udhëhoqi skuadrën drejt Kullës Veriore.
Mes tymit dhe
flakëve, ai organizoi evakuimin e civilëve dhe koordinimin e skuadrës së tij.
Në një nga radiomesazhet e fundit, ai tha:
“Kemi mjaft të
plagosur. Po përpiqemi të evakuojmë sa më shumë që të mundemi.”
Këto fjalë mbeten
dëshmi e vendosmërisë dhe humanizmit të një skuadre që hyri pa hezitim në
ferrin e Kullës Veriore për të shpëtuar jetë.
Orët e fundit
Rreth orës 10:28,
Kulla Veriore u shemb. Bashkë me të, u shkatërrua edhe kamioni FDNY 55-8087 dhe
humbën jetën 11 zjarrfikës të Njësisë së Shkallëve 3, përfshirë Kapitenin
Braun.
Kamioni mbeti aty,
mes rrënojave, si një dëshmi e dhunës së përjetuar dhe e sakrificës së atyre që
ranë duke shpëtuar të tjerët.
Nga memoriali i
përkohshëm te Muzeu 9/11
Pas tragjedisë,
kamioni u vendos fillimisht në hangarët e FDNY, ku u kthye në një memorial të
përkohshëm. Familjarë, kolegë dhe vizitorë linin lule, fotografi dhe mesazhe
pranë tij. Emrat e 11 zjarrfikësve të Njësisë së Shkallëve 3 që humbën jetën u
vendosën aty si kujtesë e shenjtë.
Më pas, ai u
ekspozua në Muzeun Përkujtimor të 11 Shtatorit në Ground Zero, ku mijëra
vizitorë u përballën me simbolin e guximit dhe sakrificës së zjarrfikësve.
Epilogu i një
dëshmie
Sot, kamioni FDNY
55-8087 ndodhet në Fort Totten. I njohur edhe si “Shkallët 343”, ai është një
testament i gjallë i sakrificës së 343 zjarrfikësve të FDNY që humbën jetën më
11 Shtator.
Nuk është thjesht
një relike. Çdo gërvishtje dhe çdo pjesë e përdredhur e tij rrëfen një histori
heroizmi dhe përkushtimi. Në ditën më të errët të Nju Jorkut, Njësia e
Shkallëve 3 tregoi se kishte burra që hynin pa hezitim në flakë dhe rrënoja,
vetëm për të shpëtuar të tjerët.
Ky kamion mbetet
simbol i një sakrifice që nuk do të harrohet kurrë.
No comments:
Post a Comment