Familja nuk është
më ajo e para, patriarkale, që banonin në një shtëpi, tre kurorë me 16 a 18
fëmijë në të njëjtën vatër. Pasi ka kaluar me shpejtësi një shekull, tanimë
gjendemi përballë fakteve të reja. E vjetra është zhbërë. Reziston vetëm nëpër
skuta të mendjes konservatore dhe në zona shumë të thella ku nuk mbërrin as
vala e televizorit jo më e internetit.
Sot familja po
zhbëhet.
Por dhe ky nuk
është ndonjë lajm kush e di se çfarë. Se që po zhbëhet, kjo dihet se “ka marrë
ferra uratën”.
Sot, një familje
tradicionale, - madje dhe konservatore nëse e quajmë sërish nuk gabojmë, -
përbëhet në rastin më të mirë nga 4 persona, dy të rritur e dy fëmijë. Me raste
të rralla bëhen dhe pesë frymë brenda një çatie. Por me shumë gjasa po shtohen
ndjeshëm fëmijët që në themel kanë dy persona e që në terminologjinë e sotme
quhet “nënë singëll”. Domethënë një femër me një fëmijë, por pa burrë. “baba
singëll” është një modë që ende nuk ka hyrë si duhet në treg, por është në faza
testimi.
Institucioni i
familjes po zhbëhet.
Dhe të mendosh që
është institucioni më i vjetër në botë. Njerëzit krijonin familje edhe kur
shoqëritë nuk kishin ligje. Nuk kishin as Presidencë, as Këshill Ministrash, e
që nuk bëhej fjalë për Gjykatë Kushtetuese. Por familje kishte.
Po të lexosh
andej-këtej, në libra me kapakë të trashë apo në portale nga ekrani i sheshtë,
do të gjesh pak a shumë këto përkufizime: "Institucioni i familjes"
është një koncept që lidhet me rolet dhe funksionet e familjes në shoqëri. Kjo
përfshin strukturën dhe dinamikën e familjes si një institucion shoqëror që
ndikon në rritjen dhe zhvillimin e anëtarëve të saj." Kjo përfshin dhe
normat, vlerat dhe rolet që ndikojnë në marrëdhëniet brenda familjes dhe me
shoqërinë. Familja shpesh konsiderohet si një institucion i rëndësishëm në
krijimin dhe mbajtjen e lidhjeve shoqërore dhe në edukimin e brezave të rinj.
Ja e morëm dhe
masën filozofiko-sociale të pyetësorit: Ç'është familja?
Njerëzit krijojnë
familje. Madje dhe kafshët dinë të krijojnë familje. Dinë t’i qëndrojnë besnik
një partneri e të rrisin fëmijët aq sa ata të dinë të ushqehen vetë.
Megjithatë, familja
në mijëvjeçarin e ri është në rrezik. Prej kohësh ajo ka filluar zhbërjen. Dhe
ka nisur të paktën që me revoltat e hipive të viteve ‘70 të shekullit të
kaluar. Por tani është edhe më keq. Gjëra janë thelluar.
Në botën njerëzore
po ndodhin thagma pa fund. Nuk jemi në epokën e inkuizicionit ku digjeshe në
turrën e druve për hiç mosgjë, por ende si shoqëri njerëzore njohim ndëshkimin
e gruas për tradhti, deri në vrasjen me gurë. Por kjo nuk ndodh në shoqëritë e
emancipuara. Mes dy poleve të pushtuara nga koncepte diametralisht të kundërta,
janë të lumtur ata që kanë kuptuar ku ndodhet mesi. Dhe këtu nuk ju ndihmon
gjeometria, dhe as metri si njësi matëse.
Në botën
perëndimore sot flitet për të tjera gjëra. Të rinjtë tremben nga martesa. Nuk
ka më dasma. Ka bashkëjetesë. Por nuk nënshkruhet asnjë kontratë. Qëllimi është
për të qenë të lirë nga partneri. Nuk është ide e keqe. Ka vend për debat.
Sepse as kontrata e firmosur dhe unazat e floririt nuk e mbajnë dot lidhur
martesën. Por dardha e ka bishtin prapa, gjithsesi.
Sot janë futur
dukshëm në modë kontratat paramartesore. Ka kontrata për mosbashkim e mosndarje
pasurie. Këtu është thembra e Akilit. Kush pyet për familjen mor vëlla?! As për
kalamajtë që mbeten rrugëve, sa te njëra palë tek tjetra. Si topi i pingpongut.
Sot halli janë paratë dhe pronat e patundshme. Se gratë të marrin gjysmën e
pasurisë. Por me një avokat të fortë ka mundësi të të zbythin fare, dhe nga një
milioner me vilë e jaht në dispozicion, mund ta shohësh veten duke jetuar në
një garsoniere duke skuqur patate me keçap për mëngjes dhe dy vezë sy për
darkë. Prandaj mallkuar qoftë ai që e shpiku martesën.
Familjet po
prishen. Institucioni i familjes po shembet. Njerëzit po mundohen të jetojnë të
lirë.
Gazetarja e njohur
italiane Oriana Falaci shkruante për problematikën e martesës në vendet e
lindjes së mesme. Atje burri është Zot e femra një skllave e bindur.
Mjerë ato!
Këtej nga Evropa
punët po ecin nga krahu tjetër.
Vatikani jep
bekimin për ata që bëjnë seks brenda të njëjtës gjini. Por ata vetë kanë shkuar
dhe më tej. Nuk është puna tek seksi dhe tek ligjërimi i aktivitetit të tyre.
Ata janë më shumë të prirë për të bërë dasma e për t’u martuar me të ftuar të
rafinuar dhe aheng, madje dhe me një ceremoni në gjendje civile. Por duan të
shkojnë në altar. Ç'rëndësi ka kush është burri e kush është gruaja. Duan të
bëjnë dhe fëmijë. Jo t’i birësojnë. Kjo është modë e vjetër. Sot mjekësia po
bën çudira. E lënë dhe burrin me barrë.
-Doktor, në vend
të fryhet gruaja po fryhem unë, - do t’i thoshte Xhixhi, doktor Zeqo Pilafit
tek komedia “Gjithë fajet i ka paraja”.
-Paska mbetur një
burrë me barrë, - shqeu sytë doktor Zeqoja, që dikur kishte qenë roje në
ndërmarrjen e grumbullimit.
-Ç'ja fut kot dhe
ti, - ia ktheu me mosbesim e shoqja që i mbeti në mes numërimi i parave të
fituara gjatë ditës.
Mirëpo ku ka zë
s’është pa gjë. Se dhe Arnold Shvarceneger, gjithë muskuj, luajti rolin e një
burri shtatzënë tek filmi “Junior” prodhuar në vitin 1994. U gajas kinemaja.
Hajd mo, kush po
pyt më?!
Mjeket janë turrur
të bëjnë operacione transgjëndër. Burrat po kthehen në gra. A thua se bota
ishte në krizë për gjininë femërore.
Epo qejfe-qejfe
kjo dynja, do thotë ndokush.
-Ka qejf, ka para,
- do të fërkonte duart tek filmi “Përballimi”, pronari i një zgëqeje që bënte
kërnacka në Korçën e pas Luftës së Dytë Botërore.
Familja po
zhbëhet. Bota po mbipopullohet. E mbipopullon bota e tretë. Kurse bota e
zhvilluar po plaket me shpejtësi. Këto janë të kundërta të pakuptueshme.
Vazhdojmë me
leximin e literaturës. Se diku duhet gjetur ngushëllimin, dhe has: Shkatërrimi
i një familjeje është një proces i vështirë dhe mund të ndikojë emocionalisht tek
të gjithë anëtarët. Ka shumë arsye pse një individ nuk mund të krijojë një
familje, përfshirë zgjedhjet personale, situatat ekonomike ose sfidat
individuale. Njëkohësisht, disa persona zgjedhin të jetojnë një jetë të pavarur
dhe nuk ndjekin rrugën e martesës apo krijimit të një familjeje. Çdo zgjedhje
është unike për secilin person”.
U ngushëllova
disi.
Institucioni i
familjes po shembet. Faktor është dhe krimi në familje. Në Shqipëri është
rritur ndjeshëm ky lloj krimi. Herë burri vret gruan, herë babai vret djalin
ose vajzën, por ka dhe raste kur fëmijët vrasin babain. Fjala vjen, bëhen tre
fëmijë dhe heqin qafe babain.
-Po na shau o...
derri i derrit.
Kjo do të thotë që
institucioni i familjes në Shqipëri po vihet në pikëpyetje. Ndoshta nuk po
shpërbëhet, por do të shpërbëhet.
No comments:
Post a Comment